Si kryhet ky ekzaminim?

Zakonisht ky test zgjat rreth 45 min, përvec rasteve kur kërkohen ekzaminime të zgjatura (90 -120 minuta). Teknikja do kryejë disa matje për vendosjen e saktë të elektrodave. Këto elektroda me anë të disa telave të gjatë lidhen me aparatin e EEG-së. Teknikja e EEG-së do t’ju kërkojë të relaksoheni, të qëndroni të qetë, me sy mbyllur dhe herë pas here të ndiqni komandat e thjeshta që ajo do t’ju japë, si psh të hapni/mbyllni sytë. Gjatë regjistrimit mund t’ju kërkohet të bëni gjithashtu edhe dy procedura të tjera:

• Frymëmarrje të thella dhe të shpeshta për të paktën 3 min. Ky ushtrim mund të nxisë ndryshime në aktivitetin elektrik të trurit dhe mund të ndihmojë në përcaktimin e diagnozës.
• Foto stimulimi. Ju do t’ju kërkohet të shikoni një dritë të shkëlqyeshme që flashon me shpejtësi të ndryshme, të paktën 10 sekonda secila.

Ekzaminimi i EEG nuk shkakton dhimbje, nuk ka efekte anësore apo rrezatim. Përgjigjja e testit merret zakonisht një ditë pas kryerjes së ekzaminimit.